Zhvillimet e Tregut të Sigurimeve në Shqipëri për Vitin 2008
Gjatë vitit 2008 numri i kontratave të sigurimit të lidhura arriti në 692,334, duke shënuar një rritje prej rreth 27.33% në krahasim me vitin 2007. Rritja e numrit të kontratave në 2008 u shoqërua me rritjen e vëllimit të të ardhurave nga primet. Primet e shkruara bruto të sigurimeve arritën në rreth 7,090 milionë lekë, shifër kjo 19.45% më e lartë se ajo e të njejtës periudhë të vitit 2007. Tregu vazhdoi të mbetet sërish i orientuar tek sigurimet e Jo-Jetës që sollën rreth 92.70% të vëllimit të përgjithshëm të primeve, duke i lënë sigurimet e Jetës me rreth 7.30%. Parë nga këndvështrimi i ndarjes së tregut sipas llojit të sigurimit i detyrueshëm dhe vullnetar, primet e shkruara bruto të sigurimit vullnetar zënë 43.82% dhe primet e shkruara bruto të sigurimit të detyrueshëm zënë 56.18% të totalit të tregut. Rritja e volumit të primeve të shkruara bruto në sigurimin vullnetar tregon për një ndryshim të strukturës së tregut të sigurimeve ndikuar nga rritja e ndjeshme e sigurimeve vullnetare.
Sigurimi i Detyrueshëm
Gjatë vitit 2008 sigurimi i detyrueshëm vazhdoi të dominojë në tregun Shqiptar, duke sjellë rreth 56.18% të të ardhurave nga primet e shkruara bruto të sigurimeve.
- Të ardhurat nga primet e shkruara bruto të sigurimit të TPL-së së brendshme në vitin 2008 janë rreth 2,729 milionë lekë. Rritja e të ardhurave me 5.92% krahasuar me të njejtën periudhë të vitit 2007 lidhet me rritjen prej 6.73% të numrit të kontratave.
- Të ardhurat nga primet e shkruara bruto të Kartonit Jeshil arritën rreth 933 milionë lekë, ose 18.15% më shumë se në 2007, ndërsa numri i kontratave pati një rritje prej 12.76% krahasuar me 2007.
- Sigurimi Kufitar shënoi ulje në grupin e sigurimeve të detyrueshme me rreth 35.63% në krahasim me vitin 2007. Në të njejtën kohë numri i kontrave të sigurimit kufitar pati një rritje në masën 11.02%. Gjatë kësaj periudhe, primet e shkruara bruto nga sigurimi kufitar arritën në rreth 322 milionë lekë.
Sigurimi Vullnetar
Gjatë vitit 2008, vëllimi i primeve të shkruara bruto në sigurimin vullnetar arriti shifrën 3,107 milionë lekë me një rritje prej 50.06% kundrejt një viti më parë dhe rreth 57.44% rritje të numrit të kontratave të sigurimit.
Të ardhurat nga produktet vullnetare të sigurimit të Jo-Jetës u rritën me rreth 55.90% krahasuar me një vit më parë.
Në portofolet e pronës, përgjegjësive, garancive me të ardhura rreth 1,780 milionë lekë në total, vendin e parë e zunë sigurimi i përgjegjësive të përgjithshme civile me 42.25% i pasuar nga sigurimet nga zjarri dhe dëmtime në pronë me rreth 39.46% dhe sigurimi i garancisë me 10%.
Në vitin 2008, sigurimet e përgjegjësisë kanë dinamikën më të lartë të rritjes dhe ndikimin kryesor në rritjen e tregut të pronës, përgjegjësive dhe garancive. Rritja e këtij portofoli me rreth 151% krahasuar me vitin 2007, reflekton ndikimin që stadi aktual i zhvillimit të vendit ka në rritjen e sigurimit të përgjegjësive. Sigurimet inxhinierike në këtë periudhë patën një rritje prej 187% në volumin e primeve të shkruara bruto si dhe një rritje me 38.87% të numrit të kontratave, krahasuar me vitin e kaluar. Kjo shpjegohet me rritjen e investimeve në infrastrukturë dhe në ndërtime të tjera inxhinjerike.
Në portofolin zjarri dhe rreziqet shtesë vihet re një rritje prej 24.99% e numrit të kontratave të sigurimit dhe një rritje me rreth 24.36% e volumit të primeve të shkruara bruto.
Të ardhurat nga sigurimet e aksidenteve personale dhe shëndetit në vitin 2008 arritën në rreth 313 milionë lekë, duke shënuar një rritje prej 67.61% në krahasim me vitin 2007. Peshën më të madhe e mbajtën sigurimet e shëndetit me rreth 79.07% të të ardhurave të këtij grupi. Rritja e madhe e të ardhurave në sigurimin e shëndetit lidhet si me rritjen e të ardhurave të sigurimit të shëndetit në udhëtim dhe me rritjen e të ardhurave të shëndetit privat.Vëllimi i primeve të sigurimit të Jetës arriti në rreth 518 milionë lekë me një rritje prej 26.40% krahasuar me vitin 2007.
Peshën më të madhe prej rreth 73.38% në të ardhurat e sigurimit të Jetës e zë produkti Jetë Debitori. Ky produkt i sigurimit është kërkesë e Bankave të nivelit të dytë për ofrimin e kredive individëve dhe personave juridikë.
Dëmet e Paguara Bruto
Totali i dëmeve të paguara bruto nga shoqëritë e sigurimeve në vitin 2008 ishte rreth 1,549 milionë lekë, ose 18.19 % më shumë se në vitin 2007. Pjesa më e madhe e dëmeve të paguara bruto u përket sigurimeve motorrike me 1,216 milionë lekë, apo 78.46 % të totalit të dëmeve të paguara bruto..
Duke i hedhur një vështrim dëmit mesatar në produktet e sigurimit motorrik, meqënëse ky lloj sigurimi ka dhe peshën më të madhe në pagesën e dëmeve, të bie në sy një rritje e vlerës së dëmit mesatar për MTPL e brendshme, Karton Jeshil dhe Kasko paraqitur në tabelën e mëposhtme:
në mijë lekë
Lloji i sigurimit | Viti | |
2007 | 2008 | |
Dëmi mesatar | ||
MTPL e brendshme | 86 | 94 |
Karton Jeshil | 679 | 789 |
Kasko | 79 | 91 |
Për çdo të interesuar, Buletini Statistikor Janar - Dhjetor 2008 përmban të dhena më detajuara të ndarjes së Tregut të Sigurimeve sipas llojit të sigurimit, sipas produkteve të sigurimit, pjesëmarrjes së shoqërive të sigurimit etj.