Zhvillimet e Tregut të Sigurimeve në Shqipëri për periudhën Janar - Prill 2009
Në periudhën janar - prill 2009, numri i kontratave të sigurimit të lidhura arriti në 230,621 duke shënuar një rritje prej rreth 29% në krahasim me të njëjtën periudhë të vitit 2008. Rritja e numrit të kontratave në 2009 u shoqërua me rritjen e vëllimit të të ardhurave nga primet. Primet e shkruara bruto të sigurimeve arritën në rreth 2,659 milionë lekë, shifër kjo 29% më e lartë se ajo e të njëjtës periudhë të vitit 2008. Tregu vazhdoi të mbetet sërish i orientuar tek sigurimet e Jo-Jetës, që sollën rreth 92% të vëllimit të përgjithshëm të primeve, duke i lënë sigurimet e Jetës me rreth 8%. Parë nga këndvështrimi i ndarjes së tregut sipas llojit të sigurimit i detyrueshëm dhe vullnetar, primet e shkruara bruto të sigurimit vullnetar zënë 46% dhe primet e shkruara bruto të sigurimit të detyrueshëm zënë 54% të totalit të tregut. Rritja e volumit të primeve të shkruara bruto në sigurimin vullnetar, tregon për një ndryshim të strukturës së tregut të sigurimeve, ndikuar nga rritja e ndjeshme e sigurimeve vullnetare.
Sigurimi i Detyrueshëm
Gjatë kësaj periudhe të vitit 2009 sigurimi i detyrueshëm vazhdoi të dominojë në tregun Shqiptar, duke sjellë rreth 54% të të ardhurave nga primet e shkruara bruto të sigurimeve.
-
Të ardhurat nga primet e shkruara bruto të sigurimit të TPL-së së brendshme në janar - prill të vitit 2009 janë rreth 927 milionë lekë ose 1% më pak se periudha janar - prill 2008, ndërsa numri i kontratave ka pësuar një ulje prej 3%, krahasuar me të njëjtën periudhë të vitit të kaluar.
-
Në periudhën janar - prill 2009, të ardhurat nga primet e shkruara bruto të Kartonit Jeshil arritën rreth 446 milionë lekë, ose 42% më shumë se në të njëjtën periudhë të vitit 2008, ndërsa numri i kontratave pati një rritje prej 4%, krahasuar me të njëjtën periudhë të një viti më parë.
-
Sigurimi Kufitar, gjatë kësaj periudhe 4 - mujore të vitit 2009 të ardhurat e këtij lloj sigurimi shënuan një rritje me 28%, krahasuar me periudhën janar - Pprill 2008 dhe numri i kontratave të sigurimit kufitar pati një rritje në masën 10%, krahasuar me të njëjtën periudhë të një viti më parë.
Sigurimi vullnetar
Në periudhën janar - prill 2009, vëllimi i primeve të shkruara bruto në sigurimin vullnetar arriti shifrën 1,223 milionë lekë me një rritje prej 58%, kundrejt të njëjtës periudhë të një viti më parë, dhe po me të njëjtën shifër, rreth 71% rritje të numrit të kontratave të sigurimit, krahasuar me të njëjtën periudhë të një viti më parë.
Të ardhurat nga produktet vullnetare të sigurimit të Jo - Jetës u rritën me rreth 65%, krahasuar me të njëjtën periudhë të një viti më parë.
Në portofolet e pronës, përgjegjësive, garancive me të ardhura rreth 666 milionë lekë në total, vendin e parë e zunë zjarri dhe dëmtime në pronë me rreth 47%, të pasuara nga sigurimi i përgjegjësive të përgjithshme civile me 33% dhe më pas vjen sigurimi i garancive me 9%.
Në portofolin Zjarri dhe rreziqet shtesë ndihet një rritje prej 10% e numrit të kontratave të sigurimit dhe rritje me rreth 31% të volumit të primeve të shkruara bruto të këtij portofoli.
Në janar - prill të vitit 2009, sigurimet e përgjegjësisë vazhdojnë të ruajnë dinamikën më të lartë të rritjes. Rritja e këtij portofoli me rreth 133%, krahasuar me janar - prill të vitit 2008, reflekton ndikimin që stadi aktual i zhvillimit të vendit ka në rritjen e sigurimit të përgjegjësive. Sigurimet inxhinierike, të analizuara veçmas si portofol në sigurimet e përgjegjësive, në këtë periudhë shumëfishuan rritjen në volumin e primeve të shkruara dhe në numrin të kontratave, krahasuar me të njëjtën periudhë të vitit të kaluar. Kjo shpjegohet me rritjen e investimeve në infrastrukturë dhe në ndërtime të tjera inxhinierike.
Të ardhurat nga sigurimet e aksidenteve personale dhe shëndetit në periudhën janar - prill të vitit 2009 arritën në rreth 135 milionë lekë, duke shënuar një rritje prej 81% në krahasim me të njëjtën periudhë të vitit 2008. Peshën më të madhe e mbajtën sigurimet e shëndetit me rreth 76% të të ardhurave të këtij grupi. Rritja e madhe e të ardhurave në sigurimin e shëndetit lidhet, si me rritjen e të ardhurave të sigurimit të shëndetit në udhëtim, ashtu edhe me rritjen e të ardhurave të shëndetit privat.
Vëllimi i primeve të sigurimit të Jetës arriti në rreth 208 milionë lekë me një rritje prej 32%, krahasuar periudhën janar - prill të vitit 2008.Peshën më të madhe prej rreth 68% në të ardhurat e sigurimit të Jetës e zë produkti "Jetë Debitori". Ky produkt i sigurimit është kërkesë e bankave të nivelit të dytë për ofrimin e kredive individëve dhe personave juridikë.
Dëmet e paguara bruto
Totali i dëmeve të paguara bruto nga shoqëritë e sigurimeve në janar - prill të vitit 2009 ishte rreth 480 milionë lekë, ose 19% më shumë se në janar - prill të vitit 2008.
Pjesa më e madhe e dëmeve të paguara bruto u përket sigurimeve motorrike me 422 milionë lekë, apo 88% të totalit të dëmeve të paguara bruto.
Duke i hedhur një vështrim dëmit mesatar në produktet e sigurimit motorrik, meqenëse ky lloj sigurimi ka dhe peshën më të madhe në pagesën e dëmeve, të bie në sy një rritje e vlerës së dëmit mesatar për MTPL e brendshme, Kasko Karton Jeshil, paraqitur në tabelën e mëposhtme:
në mijë lekë
Lloji i sigurimit |
Viti |
|
2008 |
2009 |
|
Dëmi mesatar |
||
MTPL e brendshme |
91 |
95 |
Karton Jeshil |
677 |
535 |
Kasko |
92 |
95 |
Për çdo të interesuar, Raporti Mujor Statistikor janar - prill 2009 përmban një pasqyrë të detajuar të ndarjes së Tregut të Sigurimeve sipas llojit të sigurimit, sipas produkteve të sigurimit, pjesëmarrjes së shoqërive të sigurimit, etj.