AMF, tryeza diskutimi me përfaqësues të tregut mbi kuadrin rregullator të tregjeve të kapitalit
Nga data 5-16 dhjetor 2022, Autoriteti Mbikëqyrjes Financiare në bashkëpunim me Bankën Botërore dhe Sekretariatin Shtetëror Zviceran për Çështjet Ekonomike (SECO) zhvilloi një seri tryezash diskutimi mbi kuadrin rregullator për tregjet e kapitalit.
Në këto takime u diskutua me përfaqësues të subjekteve që operojnë në tregjet e kapitalit si dhe institucioneve me rol kyç në këto tregje në lidhje me projektrregulloret e reja, të hartuara në përputhje me Direktivat e Bashkimit Evropian dhe në zbatim të Ligjit nr. 62/2020 "Për Tregjet e Kapitalit".
Ekpertët e huaj, të cilët kanë asistuar Autoritetin në hartimin e kuadrit të ri ligjor e rregullator për tregjet e kapitalit shkëmbyen mendime me përfaqësues të tregut të kapitalit dhe palët e interesit në lidhje me funksionimin në praktikë të projektrregulloreve. Gjatë takimeve të pranishmit dhanë mendimet e tyre, si edhe shtruan pyetje për çështje të caktuara.
Disa prej projektrregulloreve të trajtuara në këto takime ishin:
- Projektrregullorja “Për formën dhe përmbajtjen e prospektit që publikohet kur titujt i ofrohen publikut dhe pranohen për tregtim në një treg të rregulluar”;
- Projektrregullorja “Për kërkesat e transparencës në lidhje me informacionin e shoqërive të listuara”;
- Projektrregullorja “Për mjaftueshmërinë e kapitalit të shoqërisë komisionere”;
- Projektrregullorja “Për ushtrimin e veprimtarisë operacionale të shoqërive komisionere dhe bankave që ofrojnë shërbime investimi”;
- Projektrregullore “Për kriteret e licencimit dhe funksionimit të operatorëve të tregut dhe bursave që vënë në funksion veprimtarinë e një tregu të rregulluar dhe operatorëve të njohur të tregut”;
- Projektrregullore “Mbi emërimin dhe kriteret e audituesve ligjorë të shoqërive komisionere”;
- Projektrregullore “Për kriteret e licencimit dhe funksionimit të Depozitarit Qendror të Titujve”, etj.