Shqipëria do të mikpresë në vitin 2025 për herë të parë mbi 158 autoritete mbikëqyrëse dhe rregullatore të tregut të sigurimeve nga e gjithë bota, të cilat aderojnë në Organizatën Ndërkombëtare të Mbikëqyrësve në Sigurime (IAIS). Aktiviteti, më i rëndësishmi për organizatën që përfaqëson mbikëqyrësit ndërkombëtarë, do të organizohet nga Autoriteti i Mbikëqyrjes Financiare (AMF), në cilësinë e autoritetit mbikëqyrës të vendit pritës.

Kjo është konfirmuar në letrën e dërguar nga Sekretari i Përgjithshëm i IAIS, z. Jonathan Dixon, për Drejtoreshën e Përgjithshme Ekzekutive në Detyrë të AMF-së, znj. Mimoza Kaçi, ku ai informon se Komiteti Ekzekutiv i IAIS ka miratuar kandidaturën e Shqipërisë për organizimin e Konferencës Vjetore, Mbledhjet e Përgjithshme Vjetore, si edhe Mbledhjet e Komiteteve. “Në emër të Organizatës, dua t’ju falënderoj për mbështetjen Tuaj dhe për lidershipin e treguar,” theksohet në letrën e dërguar nga Sekretari i Përgjithshëm i IAIS, z. Jonathan Dixon.

Në vazhdim, një punë intensive e përbashkët e strukturave të IAIS dhe Autoritetit pritet të përcaktojë dhe detajet e këtij organizimi, i cili gjithashtu do të promovojë më tej Shqipërinë në arenën ndërkombëtare.

Për herë të parë, eventi më i rëndësishëm në nivel global i tregut të sigurimeve, i cili mbledh bashkë institucionet mbikëqyrëse dhe rregullatore, si dhe aktorët më të rëndësishëm ndërkombëtarë të këtij tregu, organizohet në Shqipëri.