Zhvillimet e Tregut të Sigurimeve në Shqipëri për vitin 2013
Të ardhurat nga primet e shkruara bruto të sigurimit për vitin 2013 arritën rreth 8,535 milionë lekë, ose 4.63% më pak se në vitin 2012. Gjatë vitit 2013, numri i kontratave të sigurimit të lidhura arriti në 995,777 me një ulje prej 5.87% krahasuar me një vit më parë. Tregu vazhdoi të mbetet sërish i orientuar tek sigurimet e Jo-Jetës, të cilat sollën rreth 88.12% të vëllimit të përgjithshëm të primeve, duke i lënë sigurimet e Jetës me rreth 11.25% dhe veprimtarinë e Risigurimit me rreth 0.63%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 54% dhe primet e shkruara bruto të sigurimit të detyrueshëm zënë 46% të totalit të tregut.
Gjatë vitit 2013, dëmet e paguara bruto në tregun e sigurimeve, arritën në rreth 2,696 milionë lekë, ose 3.96% më pak se viti 2012.
Sigurimi i Detyrueshëm Motorik
Primet e sigurimit të detyrueshëm motorik, në vitin 2013 arritën rreth 3,866 milionë lekë, ose rreth 15.55% më pak se viti 2012.
Produkti MTPL e brendshme, në vitin 2013, pati ulje prej 18.59% të volumit të primeve të shkruara bruto, ndërsa numri i kontratave pati një rritje prej 11.83% krahasuar me vitin 2012.
Produkti Sigurim Kufitar, në vitin 2013 pati një ulje prej 23.33% të volumit të primeve të shkruara bruto, e shoqëruar edhe me ulje të numrit të kontratave me 12.06% krahasuar me vitin 2012.
Produkti Karton Jeshil, në vitin 2013 pati rritje me 5.18% të volumit të primeve të shkruara bruto, krahasuar me vitin 2012. Gjithashtu edhe numri i kontratave u rrit me 4.67%.
Sigurimi Vullnetar
Primet e sigurimit vullnetar, në vitin 2013 arritën rreth 4,616 milionë lekë, ose 6.26% më shumë se në vitin 2012. Kjo u shoqërua me ulje të numrit të kontratave të sigurimit vullnetar me 15.09% krahasuar me një vit më parë.
Sigurimet vullnetare të Jo-Jetës, gjatë vitit 2013, patën rritje me rreth 5.55% kundrejt një viti më parë.
Në portofolet e pronës, përgjegjësive, garancive të cilat gjatë vitit 2013, siguruan rreth 2,391 milionë lekë të ardhura në total, vendin e parë e zunë zjarri dhe dëmtime të tjera në pronë, me rreth 82.38% të pasuara nga sigurimi i përgjegjësive të përgjithshme civile me rreth 10.24% të totalit.
Në portofolin sigurimi nga zjarri dhe forcat e natyrës, gjatë vitit 2013, vihet re një ulje prej 3.79% e volumit të primeve të shkruara bruto të këtij portofoli dhe një rritje me rreth 6.80% e numrit të kontratave të sigurimit, krahasuar me vitin 2012.
Të ardhurat nga sigurimet e aksidenteve dhe shëndetit, gjatë vitit 2013, arritën në mbi 669 milionë lekë, duke shënuar rritje prej 7.73% në krahasim me vitin 2012.
Primet nga sigurimet e Jetës gjatë vitit 2013, arritën mbi 960 milionë lekë, ose rreth 9.06% më shumë se në vitin e kaluar.
Dëmet e Paguara Bruto
Pagesat e dëmeve gjatë vitit 2013 u ulën me rreth 3.96% krahasuar me vitin 2012. Pjesa më e madhe e dëmeve të paguara bruto i përket sigurimit motorik me rreth 2,197 milionë lekë, apo 81.51% të totalit të dëmeve të paguara bruto.
Tabela më poshtë paraqet dëmin mesatar për disa nga produktet e sigurimit motorik.
Buletini Statistikor për vitin 2013 është rifreskuar më datë 03/09/2014, me shifrat përfundimtare të korrigjuara dhe të ridepozituara në AMF.
Për të lexuar materialin e plotë të raportit statistikor për periudhën janar-dhjetor 2013 (në versionin EXCEL) klikoni këtu