Në periudhën Janar - Korrik 2009 numri i kontratave të sigurimit të lidhura arriti në 444,574 duke shënuar një rritje prej rreth 23.74 % në krahasim me të njejtën periudhë të vitit 2008. Rritja e numrit të kontratave në 2009 u shoqërua me rritjen e vëllimit të të ardhurave nga primet. Primet e shkruara bruto të sigurimeve arritën në rreth 4,774 milionë lekë, shifër kjo 18.56 % më e lartë se ajo e të njejtës periudhë të vitit 2008. Tregu vazhdoi të mbetet sërish i orientuar tek sigurimet e Jo-Jetës që sollën rreth 91.38 % të vëllimit të përgjithshëm të primeve, duke i lënë sigurimet e Jetës me rreth 8.62 %. Parë nga këndvështrimi i ndarjes së tregut sipas llojit të sigurimit i detyrueshëm dhe vullnetar, primet e shkruara bruto të sigurimit vullnetar zënë 47.34 % dhe primet e shkruara bruto të sigurimit të detyrueshëm  zënë 52.66 % të totalit të tregut. Rritja e volumit të primeve të shkruara bruto në sigurimin vullnetar tregon për një ndryshim të strukturës së tregut të sigurimeve ndikuar nga rritja e ndjeshme e sigurimeve vullnetare.

Ndarja e tregut të sigurimeve për periudhën Janar - Korrik 2009          

Sigurimi i Detyrueshëm

Gjatë kësaj periudhe të vitit 2009 sigurimi i detyrueshëm vazhdoi të dominojë në tregun Shqiptar, duke sjellë rreth 52.66 % të të ardhurave nga primet e shkruara bruto të sigurimeve.

• Të ardhurat nga primet e shkruara bruto të sigurimit të TPL-së së brendshme në Janar - Korrik të vitit 2009 janë rreth 1,661 milionë lekë ose 2.85 % më shumë se periudha    Janar- Korrik 2008 ndërsa numri i kontratave ka pësuar një rritje prej 0.70 % krahasuar me të njejtën periudhë të vitit të kaluar.
• Në periudhen Janar- Korrik 2009, të ardhurat nga primet e shkruara bruto të Kartonit Jeshil arritën rreth 684 milionë lekë, ose 24.40% më shumë se në të njejtën periudhë të vitit 2008, ndërsa numri i kontratave pati një rritje prej 1.64 % krahasuar me të njejtën periudhë të një viti më parë.
• Të ardhurat e Sigurimit Kufitar, një periudhën Janar - Korrik të vitit 2009 shënuan një rritje me 20.82% krahasuar me periudhën Janar - Korrik 2008 dhe numri i kontrave të sigurimit kufitar pati një rritje në masën 5.30% krahasuar me të njejtën periudhë të një viti më parë.

Sigurimi Vullnetar

Në periudhen Janar - Korrik 2009,  vëllimi i primeve të shkruara bruto në sigurimin vullnetar arriti shifrën 2,260 milionë lekë me një rritje prej 31.25 % kundrejt të njejtës periudhë të një viti më parë, dhe me rreth 52.09 % rritje të numrit të kontratave të sigurimit krahasuar me të njejtën periudhë të një viti më parë.

Të ardhurat nga produktet vullnetare të sigurimit të Jo-Jetës u rritën me rreth 30.41% krahasuar me të njejtën periudhë të një viti më parë.

Në portofolet e pronës, përgjegjësive, garancive me të ardhura rreth 1,229 milionë lekë në total, vendin e parë e zunë zjarri dhe dëmtime në pronë me rreth 43.71% të pasuara nga sigurimi i përgjegjësive të përgjithshme civile me 33.02 % dhe më pas vjen  sigurimi i garancive  me 11.65%.

Në portofolin ‘Zjarri dhe rreziqet shtesë' ndihet një rritje prej 8.71 % e numrit të kontratave të sigurimit dhe rritje me rreth 33.79 % të volumit të primeve të shkruara bruto të këtij portofoli.

Në Janar - Korrik të vitit 2009, sigurimet e përgjegjësisë vazhdojnë të ruajnë dinamikën më të lartë të rritjes. Rritja e këtij portofoli me rreth 7.37 % krahasuar me Janar - Korrik të vitit 2008, reflekton ndikimin që stadi aktual i zhvillimit të vendit ka në rritjen e sigurimit të përgjegjësive. Sigurimet inxhinierike të analizuara veçmas si portofol në sigurimet e përgjegjësive, në këtë periudhë patën një ulje prej 10.54 % në volumin e primeve të shkruara dhe një rritje me 75.00 %  në numrin e kontratave, krahasuar me të njejtën periudhë të vitit të kaluar.

Të ardhurat nga sigurimet e aksidenteve personale dhe shëndetit në periudhën Janar - Korrik të vitit 2009 arritën në rreth 252 milionë lekë, duke shënuar një rritje prej 49.38 % në krahasim me të njëjtën periudhë të vitit 2008. Peshën më të madhe e mbajtën sigurimet e shëndetit me rreth 77.44 % të të ardhurave të këtij grupi. Rritja e madhe e të ardhurave në sigurimin e shëndetit lidhet si me rritjen e të ardhurave të sigurimit të shëndetit në udhëtim dhe me rritjen e të ardhurave të shëndetit privat.

Vëllimi i primeve të sigurimit të Jetës arriti në rreth 412 milionë lekë me një rritje prej 35.17 % krahasuar me Janar - Korrik të vitit 2008.

Peshën më të madhe prej rreth 66.09 % në të ardhurat e sigurimit të Jetës e zë produkti "Jetë Debitori". Ky produkt i sigurimit është kërkesë e Bankave të nivelit të dytë për ofrimin e kredive individëve dhe personave juridikë.

Dëmet e paguara bruto

Totali i dëmeve të paguara bruto nga shoqëritë e sigurimeve në Janar - Korrik të vitit 2009 ishte rreth 926 milionë lekë, ose 27.40 % më shumë se në Janar - Korrik të vitit 2008.

Pjesa më e madhe e dëmeve të paguara bruto u përket sigurimeve motorrike me 821 milionë lekë, apo 88.64 % të totalit të dëmeve të paguara bruto.

Duke i hedhur një vështrim dëmit mesatar në produktet e sigurimit motorrik, meqënëse ky lloj sigurimi ka dhe peshën më të madhe në pagesën e dëmeve, të bie në sy një rritje e vlerës së dëmit mesatar për Kasko dhe Karton Jeshil, paraqitur në tabelën e mëposhtme:

në mijë lekë

Për çdo të interesuar, Raporti Mujor Statistikor Janar - Korrik 2009 përmban një pasqyrë të detajuar të ndarjes së Tregut të Sigurimeve sipas llojit të sigurimit, sipas produkteve të sigurimit, pjesëmarrjes së shoqërive të sigurimit etj.