AMF organizon takimin e 15-të të Iniciativës së Evropës Qendrore, Lindore dhe Juglindore për Mbikëqyrjen e Sigurimeve
Takimi i 15-të i Iniciativës për Mbikëqyrjen e Sigurimeve të vendeve të Evropës Qendrore, Lindore dhe Juglindore, (CESEE) do të zhvillohet ditën e martë, më 12 qershor 2018, në Tiranë, nën organizimin e Autoritetit të Mbikëqyrjes Financiare.
Në këtë takim do të marrin pjesë përfaqësues të autoriteteve rregullatore dhe mbikëqyrëse nga vendet e Evropës Qendrore, Lindore dhe Juglindore, të cilët do të diskutojnë për zhvillimin e tregut të sigurimeve dhe sfidat me të cilat përballen mbikëqyrësit.
Paneli i diskutimeve është i ndarë në katër sesione, dy nga të cilat do të moderohen nga drejtues të drejtorive në AMF. Sesionet tematike përfshijnë diskutime për:
- Kriteret dhe sfidat në zbatimin e standardeve të përshtatshmërisë (fit and proper) për anëtarët e bordit, mbajtësit e posteve kyçe dhe aksionarët;
- Si të reduktohet përqendrimi i sigurimeve të detyrueshme motorike në tregun e sigurimeve, për vendet e Evropës Qendrore, Lindore dhe Juglindore;
- Menaxhimi i cilësisë dhe aktivitetet kontrolluese mbi kanalet e shpërndarjes në kompanitë e sigurimeve në kuadër të direktivës së re për kanalet e shpërndarjes në sigurime (Insurance Distribution Directive, IDD);
- Sistemi i vlerësimit të riskut për qëllime rregullatore.