11-mujori i vitit 2009 rezultoi i suksesshëm për sektorin e sigurimeve në Shqipëri, duke reflektuar rritje në të ardhurat e shoqërive të sigurimit dhe tregut në tërësi. Të ardhurat nga primet e sigurimit arritën rreth 7.152 milionë lekë, ose 9.43% më shumë se në të njëjtën periudhë të vitit të kaluar. Në periudhën janar-nentor 2009 numri i kontratave të sigurimit të lidhura arriti në 692,941 duke shënuar një rritje prej rreth 9.78%, krahasuar me  janar-nëntor 2008. Rritja e primeve ka qenë në harmoni me rritjen e numrit të kontratave të sigurimit, çfarë përforcon qëndrueshmërinë e tendencës së zhvillimit. Tregu vazhdoi të mbetet sërish i orientuar tek sigurimet e Jo-Jetës që sollën rreth 90.93% të vëllimit të përgjithshëm të primeve, duke i lënë sigurimet e Jetës me rreth 9.07%. Parë nga këndvështrimi i ndarjes së tregut sipas llojit të sigurimit të detyrueshëm dhe vullnetar, primet e shkruara bruto të sigurimit vullnetar zënë 46.31 % dhe primet e shkruara bruto të sigurimit të detyrueshëm zënë 53.69% të totalit të tregut. Rritja e ndjeshme e volumit të primeve të shkruara bruto në sigurimin vullnetar, ka ndikuar në ndryshimin e strukturës së tregut në favor të sigurimeve vullnetare.

Sigurimi i Detyrueshëm

Primet në sigurimet e detyrueshme motorike arritën shifrën 3,840 milionë lekë, ose rreth 5.02% më shumë se në të njëjtën periudhë te vitit të kaluar. Rritje të dukshme patën produktet Karton Jeshil dhe  Sigurim Kufitar, përkatësisht me 16.47% dhe 22.70% krahasuar me të njëjtën periudhë të vitit 2008. Ndërsa numri i kontratave pati një ulje prej 1.08% për Kartonin Jeshil dhe një rritje prej rreth  8.10% për Kufitaren, gjithnjë krahasuar me periudhën janar-nëntor 2008.

Produkti TPL e brendshme  me vlerë primesh rreth 2,491 milionë lekë shënoi një ulje  prej rreth 0.90%, ndërsa numri i kontratave po të këtij produkti pësoi një rritje prej 6.98% krahasuar me të njëjtën periudhë të vitit të kaluar.

Në harkun kohor të pak viteve, tregu i sigurimeve gjendet me një strukturë të përmirësuar në favor të sigurimeve vullnetare, që në 11-mujorin e 2009 sollën 46.31% të primeve të sigurimit. Primet e sigurimit vullnetar arritën vlerën rreth 3,311 milionë lekë, ose 15.03% më shumë se në  11-mujorin e vitit 2008. Kjo rritje u shoqërua  edhe me 38.87% rritje të numrit të kontratave të sigurimit  vullnetar krahasuar me të njëjtën periudhë të një viti më parë.

Sigurimet vullnetare të Jo- Jetës gjatë kësaj periudhe patën rritje prej 10.31% kundrejt periudhës janar- nëntor 2008.

Në portofolet e pronës, përgjegjësive, garancive me të ardhura rreth 1,740 milionë lekë në total, vendin e parë e zunë zjarri dhe dëmtime në pronë me 37.09 % të pasuara nga sigurimi i përgjegjësive të përgjithshme civile me 27.81% dhe më pas vjen  sigurimi i garancive  me 13.40%.

Në portofolin ‘Zjarri dhe rreziqet shtesë' vërehet një rritje prej 8.98 % e numrit të kontratave të sigurimit dhe rritje prej 11.34 % të volumit të primeve të shkruara bruto të këtij portofoli.

Në janar-nëntor të vitit 2009, sigurimet e përgjegjësisë kanë pësuar një  ulje me 34.71% krahasuar me periudhën janar-nëntor të vitit 2008. Sigurimet inxhinierike të analizuara veçmas si portofol në sigurimet e përgjegjësive, në këtë periudhë patën një ulje prej 50.57% në volumin e primeve të shkruara dhe një rritje me 35.19%  në numrin e kontratave, krahasuar me të njëjtën periudhë të vitit të kaluar.

Të ardhurat nga sigurimet e aksidenteve personale dhe shëndetit në periudhën janar-nëntor të vitit 2009 arritën në rreth 353 milionë lekë, duke shënuar një rritje prej 24.53 % në krahasim me të njëjtën periudhë të vitit 2008. Peshën më të madhe e mbajtën sigurimet e shëndetit me 75.51 % të të ardhurave të këtij grupi.

Primet nga sigurimet e Jetës në 11-mujorin e vitit 2009 arritën 649 milionë lekë, ose 39.53% më shumë se e njëjta periudhë e vitit të kaluar. Pjesëmarrja e investitorëve të huaj seriozë me përvojë të gjatë në sigurimet e jetës, po nxit pasurimin me produkte të mirëfillta të jetës dhe shëndetit, të panjohura deri tani në treg.

Dëmet e Paguara Bruto

Pagesat e dëmeve u rritën me 10.30% krahasuar me të njëjtën periudhë të vitit të kaluar. Pjesa më e madhe e dëmeve të paguara bruto u përket sigurimeve motorike me 1,343 milionë lekë, apo 86.72% të totalit të dëmeve të paguara bruto.

Miratimi i ligjit të sigurimit të detyrueshëm në sektorin e transportit në fillim të këtij viti dhe akteve nënligjore në zbatim të tij, pritet të ndikojë në shkurtimin e afateve dhe rritjen në tërësi të cilësisë së dëmshpërblimit kundrejt të dëmtuarve.

Duke i hedhur një vështrim dëmit mesatar në produktet e sigurimit motorik, meqenëse ky lloj sigurimi ka dhe peshën më të madhe në pagesën e dëmeve, të bie në sy një rritje e vlerës së dëmit mesatar për sigurimin Kasko dhe sigurimin MTPL e brendshme, paraqitur në tabelën e mëposhtme:

                                                                                                                                                                      mijë lekë

Duke ndjekur në vijimësi ecurinë e tregut Shqiptar të sigurimeve, AMF vlerëson se ky treg nuk ka pasur ndikime të ndjeshme nga situata e tregjeve financiare ndërkombëtare, me të cilën po përballen një pjesë e vendeve Evropiane. Monitorimet dhe analizat e kryera nga AMF tregojnë për një treg të qëndrueshëm dhe me kapacitet për të mirëpritur rritje edhe më të madhe në periudhat në vazhdim.