Autoriteti i Mbikëqyrjes Financiare (AMF) organizoi takimin e fundvitit, ku mblodhi bashkë të gjithë sektorin financiar, përfshirë drejtues të shoqërive të sigurimit, fondeve të investimit, fondeve të pensionit privat dhe bankave tregtare. Aktiviteti shërbeu si një moment reflektimi për arritjet e vitit që po mbyllet dhe si platformë për të diskutuar sfidat dhe objektivat për vitin 2025.

Në fjalën e saj, Drejtoresha e Përgjithshme Ekzekutive e AMF-së, znj. Mimoza Kaçi vlerësoi se gjatë vitit 2024 ka patur një përmirësim të mëtejshëm të treguesve kryesorë të shëndetshmërisë financiare të shoqërive që operojnë në tregjet nën mbikëqyrje. Ajo u ndal te disa zhvillime kryesore, ndër të cilat përmendi:

Miratimin e rregullores së faktorëve të riskut, e cila pritet të reformojë tregun e sigurimit të detyrueshëm të automjeteve, duke aplikuar modelet e vendeve të BE-së dhe duke sjellë një profilizim të primit sipas rrezikut që mbart çdo person i siguruar;

Realizimin e ndryshimeve në ligjin për sigurimin dhe risigurimin, duke harmonizuar legjislacionin vendas me standardet dhe praktikat më të mira ndërkombëtare, të cilat pritet të konsolidojnë më tej tregun, të forcojnë mbikëqyrjen e grupeve të sigurimit dhe të shtojnë transparencën;

Implementimin e udhërrëfyesit për regjimin evropian të sigurimeve (Solvency II), një hap i rëndësishëm drejt forcimit të stabilitetit të sektorit të sigurimeve dhe mbrojtjes së interesave të konsumatorëve;

Përfundimin e paketës së plotë të akteve nënligjore në zbatim të ligjit të ri për fondet e pensionit privat, që nxisin zhvillimin afatgjatë të këtyre instrumenteve të rëndësishme për planifikimin financiar personal.

Znj. Kaçi evidentoi gjithashtu rëndësinë e bashkëpunimit të ngushtë mes AMF-së dhe aktorëve të tregut, duke e konsideruar këtë si një element kyç për zhvillimin e qëndrueshëm të sektorit financiar. Drejtoresha e Përgjithshme Ekzekutive u ndal edhe te sfidat dhe prioritetet kryesore për periudhën në vazhdim:

Zbatimi i plotë dhe transparent i rregullores së faktorëve të riskut, me qëllim rritjen e qartësisë dhe parashikueshmërisë për të gjithë aktorët e tregut dhe në veçanti për personat e siguruar;

Vijimi i implementimit të udhërrëfyesit të Solvency II, duke siguruar një përafrim të plotë me direktivat evropiane dhe rritjen e qëndrueshmërisë financiare;

Zbatimi i standardeve ndërkombëtare të raportimit financiar IFRS 17, që kërkojnë realizimin e investimeve të nevojshme teknologjike, ndryshime në politikat kontabël dhe rritje të kapaciteteve profesionale;

Rritja e nivelit të digjitalizimit dhe inovacionit teknologjik në tregjet financiare, për të rritur aksesin dhe eficiencën operacionale;

Konsolidimi i mëtejshëm i tregjeve financiare, duke nxitur rritjen dhe qëndrueshmërinë e tyre në një mjedis gjithnjë e më kompleks;

Forcimi i edukimit financiar të publikut, për të siguruar një ndërgjegjësim më të lartë mbi produktet financiare dhe për të rritur besimin e konsumatorëve dhe investitorëve;

Në përfundim të fjalës së saj, znj. Kaçi theksoi rëndësinë e krijimit të një ekosistemi financiar më të integruar dhe të diversifikuar, duke nënvizuar se AMF do të vijojë të jetë një garantues i qëndrueshmërisë dhe besueshmërisë për tregjet financiare nën mbikëqyrje. Ky takim përforcoi angazhimin e AMF-së për të ndërtuar një sistem financiar modern, të qëndrueshëm dhe të orientuar drejt zhvillimit afatgjatë, duke përmbushur standardet më të larta ndërkombëtare.