Të ardhurat nga primet e shkruara bruto të sigurimit për periudhën janar 2022 kapën vlerën 1,422 milionë lekë, ose 5.16% më pak se në janar 2021. Gjatë periudhës janar 2022, numri i kontratave të sigurimit të lidhura arriti në 83,798 me një rritje prej 17.72% krahasuar me të njëjtën periudhë të një viti më parë.

Tregu mbetet i orientuar tek sigurimet e Jo-Jetës, të cilat sollën 92.55% të vëllimit të përgjithshëm të primeve, ndërsa sigurimet e Jetës kanë 7.4%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 39.68% dhe primet e shkruara bruto të sigurimit të detyrueshëm zënë 60.32% të totalit të tregut.

Gjatë periudhës janar 2022, dëmet e paguara bruto në tregun e sigurimeve, arritën në rreth 387 milionë lekë, ose 28.34% më pak se në periudhën janar 2021, ndikuar kryesisht nga pagesa e dëmshpërblimeve për tërmetet e fundvitit 2019 gjatë vitit të kaluar.

Ndërkohë dëmet e paguara bruto në sigurimin motorik për periudhën janar 2022 kapën vlerën 297 milionë lekë, duke pësuar një ulje me rreth 1.93% krahasuar me të njëjtën periudhë të një viti më parë.

Sigurimi i Detyrueshëm Motorik
Primet e sigurimit të detyrueshëm motorik, gjatë periudhës janar 2022 arritën rreth 858 milionë lekë, ose 5.86 % më shumë se në periudhën janar 2021.

Produkti MTPL e brendshme, në periudhën janar 2022, pati një rritje prej 3.79% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 2.05% krahasuar me të njëjtën periudhë të një viti më parë.

Produkti Karton Jeshil në periudhën janar 2022 pati një rritje prej 22.41% të vëllimit të primeve të shkruara bruto. Kjo u shoqërua nga një rritje të numrit të kontratave prej 22.2% krahasuar me periudhën janar 2021.

Produkti Sigurim Kufitar, në periudhën janar 2022, pati një rritje 2.02% të vëllimit të primeve të shkruara bruto krahasuar me periudhën janar 2021. Edhe numri i kontratave u rrit me 2.21%.

Sigurimi Vullnetar
Primet e sigurimit vullnetar, gjatë periudhës janar 2022 arritën rreth 564 milionë lekë, 18.11% më pak se në periudhën janar 2021. Numri i kontratave të sigurimit vullnetar u rrit me 44.07% krahasuar me periudhën janar 2021.

Primet e sigurimit vullnetar të Jo-Jetës gjatë periudhës janar 2022, patën një ulje me 22.93% kundrejt periudhës janar 2021.

Në portofolat e Pronës, Përgjegjësive, Garancive të cilat gjatë periudhës janar 2022 siguruan mbi 233 milionë lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 58.72%, të pasuara nga sigurimi i Përgjegjësisë së Përgjithshme me 29.1% të totalit.

Në portofolin sigurimi nga Zjarri dhe Forcat e Natyrës, gjatë periudhës janar 2022, vihet re një ulje prej 61.43% e vëllimit të primeve të shkruara bruto të këtij portofoli dhe një rritje me 0.45% e numrit të kontratave të sigurimit, krahasuar me periudhën janar 2021.

Të ardhurat nga sigurimet e Aksidenteve dhe Shëndetit, gjatë periudhës janar 2022, arritën në rreth 137 milionë lekë, duke shënuar një rritje prej 26.1% në krahasim me periudhën janar 2021.

Primet nga sigurimet e Jetës gjatë periudhës janar 2022, arritën rreth 105 milionë lekë, ose 11.54% më shumë se në të njëjtën periudhë të një viti më parë.

*[1]Dëmet e Paguara Bruto
Pagesat e dëmeve gjatë periudhës janar 2022 u ulën me 28.34% krahasuar me janar 2021. Pjesa më e madhe e dëmeve të paguara bruto i përket sigurimit motorik me rreth 297 milionë lekë, apo 76.59% të totalit të dëmeve të paguara bruto.

Tabela më poshtë paraqet dëmin mesatar për disa nga produktet e sigurimit motorik.